تمام اہلِ وطن اپنے اپنے’’امان اللہ‘‘کے نام جائیدادیں چیک ‏کرلیں،مبادا وہ مولانا فضل الرحمٰن کی نکل آئیں۔خوب تسلی کرلیں۔ زمانہ الٹی چال چل گیا ‏ہے۔سب کو بروقت مطلع کرنا ہمارا فرض ہے اور یہی خبرنگاری ہے۔ اس ‏لیے پھر نہ کہنا خبر نا ہوئی۔ الٹی چال یوں ہوئی کہ مفت خورے ، ڈینگ باز ‏ریڑھیوں سے مفت پھل اٹھانے ،پی ٹی وی کو چُونا لگانے اور قومی خزانے سے ‏سرکار کے طفیل مستفید ہونے والے ’’ڈاکیے‘‘ نما صحافی اور ’’مولبی‘‘ ہمیں ‏روز نئی نئی اطلاع دیتے ہیں،کبھی امان اللہ کے نام جائیداد کو مولانا فضل ‏الرحمٰن سے منسوب کرتے ہیں اور کبھی کسی حسینہ ٔ باپردہ کا’’ بیان حلفی‘‘ ‏چلاتے ہیں اور اس کو مولانا صاحب کی بہو باور کراتے ہیں۔ایک دن پریس ‏کانفرنس میں کوئی مولبی کراماً کاتبین کے جلو میں نمودار ہوتا ہے اور وہ ہمیں ‏کسی مدرسے سے ملحق دکاکین سے کرائے کی مد میں کروڑوں کی آمدن کی خبر ‏دیتے ہیں ۔ ہم نے اپنے برادر بزرگ فاروق فیصل خان صاحب کے مشہور کردار ‏بھولا سے ابھی تک یہ پوچھا تو نہیں کہ یہ’’ریفرینڈم زدہ ‘‘ ،’’کھمبی مولبی‘‘ ‏کیا پہلے بھنگ والے پکوڑے کھا کر کہیں سوئے بلکہ موئے پڑے تھے اور اب ‏یکایک جاگے ہیں اور ان پر جے یو آئی کے لیڈروں کی ’’ مخربِ اخلاق‘‘ ‏سرگرمیاں اچانک منکشف ہوگئی ہیں۔ہمارے یہاں فیک خبریوں کی ایک ‏نایاب مخلوق بھی پائی جاتی ہے۔ان کے ہوتے ہوئے آپ کو کسی فیک نیوز کا ‏سراغ لگانے کے لیے کسی تگ ودو کی ضرورت ہی نہیں۔آپ کا ان کا ممنون ‏احسان ہونا چاہیے۔ہم نے جب کسی فیک یا پراپیگنڈا خبر کی تصدیق کرنا ہوتی ‏ہے کہ یہ فیک ہی ہے توان کی ’’دیوار‘‘ سے’’ نوشتہ‘‘ پڑھ لیتے ہیں۔وہی جو ‏کہتے ہیں؛نوشتہ دیوار ۔حالیہ دنوں میں اس حادثاتی ڈاکیا نما صحافتی مخلوق کو ان ‏‏’’مولبیوں‘‘ کا ’’مصنوعہ ممنوعہ مواد ‘‘ ہاتھ لگا ہے اور اس کی خوب تشہیر کا ‏بیش قیمت ٹھیکا بھی۔اب مواد ایسا ہے، ایک وڈیو میں ایک نقاب پوش عفیفہ ‏بول رہی ہوتی ہیں اور دوسری میں وہی آواز ہے مگر چہرہ کسی عفیف کا ہے ناں ‏عفیفہ کا۔اتنے بڑے بجٹ سے اس قدر’’ گھٹیا پراڈکٹ‘‘ پر گلہ کس سے کیا ‏جائے۔ سوشل میڈیا کے لیے فوجِ ظفرموج کی بھرتی اور ’’پیداوار‘‘ یہ ‏ہے۔ جب فلم سازاس طرح کی ’’فلمیں‘‘ بنائیں گے تو ہر کسی محبِّ وطن کا ‏دل تو دکھے گا۔ صحافتی اقدار کی طرف رجوع کرنے اور پیشہ وارانہ امور بہ ‏طریق احسن انجام دینے کو کوئی تیار ہے اور نہ عقل ودانش کو ہاتھ مارنے کو ‏کوئی آمادہ ہے۔نجانے انھوں نے آخری مرتبہ عقل ودماغ اور فہم وفراست کا ‏استعمال کب کیا تھا؟ وہ تماشا کیے اور ہم دیکھا کیے۔ بھولے کا یقیناً ایک جواب تو یہ ہوگا کہ جب انھوں نے پیشۂ صحافت کو ‏بٹا لگانا شروع کیا اور دوم ،مصنوعی ذہانت کے ظہور سے پہلے کہیں عقل کو ‏استعمال کرنے کی زحمت گوارا کی ہوگی۔مصنوعی ذہانت کے بعد تو 80 سے ‏کم ذہانتی نسبت والوں کی ویسے ہی دماغی مشقت سے چھٹی ہوچکی ہے اور ‏صحافت سے انھوں نے عرصے سے رخصت لے رکھی ہے۔اب تو وہ بس لمبی ‏دہاڑیاں لگا رہے ہیں اور پیشہ صحافت کو بٹا ۔ شورش کاشمیر ی مرحوم کے الفاظ یاد آئے۔ صحافی کا قلم بک جائے تو ‏وہ طوائف سے بھی بدتر ہے۔اے اہلِ صحافت ،ان گھناؤنے چہروں کو ‏پہچانیے اور انھیں اپنی صفوں سے عاق کیجیے۔