مقتدرہ قومی زبان (اب ادارہ فروغ قومی زبان، اسلام آباد) نے یہ ‏سفارش کی تھی کہ تمام ایسے عام الفاظ جو عربی الف مقصورہ (یٰ) سے لکھے ‏جاتے ہیں، انھیں اب الف سے لکھا جائے گا۔البتہ اسماء کو اس ‏قاعدے سے استثنا حاصل ہوگا۔ یعنی استعفیٰ (عام لفظ) کا اِملا تو استعفا لکھا ‏جائے گا، لیکن موسیٰ ، عیسیٰ ،صغریٰ ، کبریٰ ایسے اسمائے معرفہ اسی عربی ‏لکھت کے انداز میں لکھے جائیں گے اور ان کے املا میں تصرف نہیں کیا جائے ‏گا۔ ‏ رشیدحسن خاں صاحب نے ان خاص اسماء کو بھی الف سے لکھنے کی ‏سفارش کی تھی بلکہ اصرار کیا تھا جبکہ ان کی یہ سفارش پاکستان یا ہندوستان ‏،کہیں چلی نہیں۔ البتہ بعض حضرات آج بھی اپنی تفردیت برقرار رکھنے یا ‏انفرادی شناخت بنانے کے لیے موسا ،عیسا، کبرا ، صغرا لکھتے پائے جاتے ہیں ‏اور خاں صاحب کی اقتدا میں اس پر إصرار بھی کرتے ہیں۔ مقتدرہ کی اسمائے معرفہ کو الف مقصورہ سے لکھنے کی سفارش میں یہ ‏وضاحت بھی کی گئی تھی کہ اگر حضرت موسیٰ اور حضرت عیسیٰ علیہما السلام ‏کے نام اُردُو میں الف سے لکھے جاتے ہیں تو ان کا قرآنی املا سے کوئی جوڑ نہیں ‏ہوگا اور مسلم عوام وخواص اس صورت میں الجھن کا شکار ہو جائیں گے۔